Shukraana

--> --> --> Ek arse se deed nahin hui teri  Ghar pe magar aaina sajaa rakkha hai Ke tujhse mulaqaat to jaane kab hogi Lekin kya jaane, Tujhe dhoondte meri khud se mulaqaat ho jaaye 24 November 2008

Dosti dhoop si, kaheen bhi chamakti hai Dosti baarish si, kisiko bhigo sakti hai Koodti phirti rehti hai dosti Kabhi dilon ke beech aati hai dosti Ek anjaana sa karwaan hai Idhar, udhar, ruk jaati hai jahaan hai Kabhi phir pet gudgudaati hai Pairon mey bhinbhinaati hai Aankhon mey phadphadaati hai Kaanon mey jhanjhanaati hai Par dosti hamari hai Humse pyaar karti hai Hamare dil mey rehti hai Ajnabi ko yaar karti hai Dosti dhoop si, kaheen bhi chamakti hai Dosti baarish si, kisiko bhigo sakti hai

Kaun kehta hai ki deewaron ke kaan hote hain? Maine to dekha hai unhe chalte hue Is kone se us kone tak, subah savere, aankh malte hue Jab kharaasha thha unhe bachpan mein ek baar To khoon nikla thha Magar jaane meri marham-patti kyun hui Kabhi chidkar unpar kitaab patki To mujh par waapas de maari Kabhi sar tek kar royi To unhone aansoo bhi pochhe mere Band kamre mein jab unse sawaal poochhe To mann me kuchh zara sa jawaab aaya to thha Is waqt bhi jab main ye peeth tek kar likh rahi hoon Wo peechhe se sahara de rahi hain Jaise vaade ki pakki koi saheli Mere akelepan pe pehra de rahi hai Paas aao to ek baat kahoon, badi pyaari saheli hai meri Par zyada na kahun to achha hai Kaan bade tez hain uske! 2006