Shukraana

Tere paas hoke, tere paas na hona Achha nahin lagta Tera ek baar hoke, tera phir na hona Achha nahin lagta Mujhpe itna bharosa thha tujhe Tera mujhse yun umeed chhodna Achha nahin lagta Hum saath chal rahe thhe na? Phir tera mujhe akela chhodna Achha nahin lagta Tere paas hoke, tere paas na hona Achha nahin lagta

Is khaalipan se chhutkara kaise karoon? Ek band band sa kamra mera Kabhi kabhi akela pad jaata hai Aur paas akar poochhta hai, saath dogi mera? 12th October 2007

Kaun kehta hai ki deewaron ke kaan hote hain? Maine to dekha hai unhe chalte hue Is kone se us kone tak, subah savere, aankh malte hue Jab kharaasha thha unhe bachpan mein ek baar To khoon nikla thha Magar jaane meri marham-patti kyun hui Kabhi chidkar unpar kitaab patki To mujh par waapas de maari Kabhi sar tek kar royi To unhone aansoo bhi pochhe mere Band kamre mein jab unse sawaal poochhe To mann me kuchh zara sa jawaab aaya to thha Is waqt bhi jab main ye peeth tek kar likh rahi hoon Wo peechhe se sahara de rahi hain Jaise vaade ki pakki koi saheli Mere akelepan pe pehra de rahi hai Paas aao to ek baat kahoon, badi pyaari saheli hai meri Par zyada na kahun to achha hai Kaan bade tez hain uske! 2006