Shukraana

Dosti dhoop si, kaheen bhi chamakti hai Dosti baarish si, kisiko bhigo sakti hai Koodti phirti rehti hai dosti Kabhi dilon ke beech aati hai dosti Ek anjaana sa karwaan hai Idhar, udhar, ruk jaati hai jahaan hai Kabhi phir pet gudgudaati hai Pairon mey bhinbhinaati hai Aankhon mey phadphadaati hai Kaanon mey jhanjhanaati hai Par dosti hamari hai Humse pyaar karti hai Hamare dil mey rehti hai Ajnabi ko yaar karti hai Dosti dhoop si, kaheen bhi chamakti hai Dosti baarish si, kisiko bhigo sakti hai

Kuchh bhi pehle saa nahin Tu jo zindagi mey aa rahi Ek dhadkan meri zyada hai Ek din kam hai, aadha hai Main to apna sa bhi raha nahin

Kabhi khelte-khelte na jaane kya sach ho jaata hai… Tab kaheen dil ko mohabbat pe yakeen aata hai Yun to pehle se dil ko mohabbat ki aadat nahin Kisi ke aane se magar, dil ye badal saa jaata hai Tab kaheen dil ko mohabbat pe yakeen aata hai Dil karta hai usko apna sab de dein Par apna kya dein use, jab wo hi apna ho jaata hai Tab kaheen dil ko mohabbat pe yakeen aata hai Darr rehta to hai kuchh dil mein, thoda yakeen bhi Par jab wo darr dil se khaali ho jaata hai Tab kaheen dil ko mohabbat pe yakeen aata hai Bekaraar rehta hai jo dil hamesha Jab wo theher ke, kisi ka intezaar kar jaata hai Tab kaheen dil ko mohabbat pe yakeen aata hai Ek khayal mera hai, mera hi rehta hai Lekin jab wo khayal tera bhi ho jaata hai Tab kaheen dil ko mohabbat pe yakeen aata hai Tab kaheen dil ko mohabbat pe yakeen aata hai

Tere paas hoke, tere paas na hona Achha nahin lagta Tera ek baar hoke, tera phir na hona Achha nahin lagta Mujhpe itna bharosa thha tujhe Tera mujhse yun umeed chhodna Achha nahin lagta Hum saath chal rahe thhe na? Phir tera mujhe akela chhodna Achha nahin lagta Tere paas hoke, tere paas na hona Achha nahin lagta

Main thak gaya hoon Mujhe sulaane aa Din bhar bhi jo na kar paaya Wo yaad dilaane aa Kabhi raasta mudta rahaa Kabhi main modta rahaa Koi sira khula vahaan Use yaheen jodta rahaa Ya koi tasveer banai maine Koi kaheen todta rahaa Is udhed-bun mein kabhi aaya chayn Kal ke sapnon main doobi meri rayn Wo rayn rang birangi, kood ti, phaand ti, lapak ti, basanti, thirakti, kabhi na thakti Par main to thak gaya hoon Abhi aankhein moondee to tera sui-dhaaga dikha mujhe Teri wo kameez bhi padi thhi thandi zameen par Ab mera badan udhah gaya hai Use sil jaane aa 2006

Kaun kehta hai ki deewaron ke kaan hote hain? Maine to dekha hai unhe chalte hue Is kone se us kone tak, subah savere, aankh malte hue Jab kharaasha thha unhe bachpan mein ek baar To khoon nikla thha Magar jaane meri marham-patti kyun hui Kabhi chidkar unpar kitaab patki To mujh par waapas de maari Kabhi sar tek kar royi To unhone aansoo bhi pochhe mere Band kamre mein jab unse sawaal poochhe To mann me kuchh zara sa jawaab aaya to thha Is waqt bhi jab main ye peeth tek kar likh rahi hoon Wo peechhe se sahara de rahi hain Jaise vaade ki pakki koi saheli Mere akelepan pe pehra de rahi hai Paas aao to ek baat kahoon, badi pyaari saheli hai meri Par zyada na kahun to achha hai Kaan bade tez hain uske! 2006